يا لحظة عم بتموت

يا لحظة العم بتموت
تِخنُق معها سنة
تمرُق عا كلّ البيوت
تتودّع هالدني،
وقّفيلي عندا شوَي،
ذكّريها بعينيّي
وعا خدودا رشّي مَيّ
وقولي عم تِبكي عليّي،
قولي عم تِبكي شَوق،
عم تبكي حنين،
تا لمّا تصيري فَوق
مع بقيّة السنين،
يبقى عندك تذكار
عأجمل عيون،
وعقلبي يللي صار،
عالبُعِد مجنون.

شو اتغيّر؟

لمّا كنّا ولاد صغار

عم نلعب تحت الزيتون

لا حكيوا علينا أخبار

ولا سألونا مين منكون

شو اللي اتغيّر، شو اللي صار

لمّا حبّينا بجنون

إن زرنا الجلّ بْشِي نهار

منصفّي حكاية العيون...

نحنا اللي سوا ربينا 

ولعبنا حدّ الدكّان

وكل الجيرة تنسينا

عم نلعب خلف الحيطان

شو يللي اتغيّر فينا

 كبرنا وصار الحبّ عنوان

وإن ورا حيط قفينا

شغلنا لسانات النسوان...

رسالة إلى وطني...

رسالة الشطآن والسهلِ والجبلْ

لوطنٍ يدّعي أنّه استقلّْ

رسالةٌ موضوعها أنّ استقلالاً

ليس باندحار أيّ محتلّ...

فالاستقلال أفعالٌ وليس حالةْ

الاستقلال أن تربّي الأبطالَ

والأبطالُ يتوحّدون، يا وطني،

يرفضون ذلاًّ وإن طالَ...

الاستقلال أن ترسم أنت الطريقْ،

وتترك العالم وتبقى طليقْ...

الاستقلال أن تتسع الأرض لأبنائها

وفي وجه الغريب... أن تضيقْ...

الاستقلال أن تكون متمرّداً أبيّْ

أن تكون الرجل بدل الصبيّْ...

الاستقلال حتّى، يا وطني،

أن تنكر المسيح وترفض النبيّْ!

انتهى عيدُك هذا العامْ،

وبينما تطفئ الأنوار كي تنامْ،

بينما تُطفئُ شموعَك، يا وطني،

ليتك تتمنّى استقلالاً... بدل السلامْ!