ما عم بفهم... ليلة غزل على تويتر

ما عم بفهم عالوردات،
اللي بردّاتي عم بتلوح،
ما بعمري سقيت الردّات، 
إلاّ من كاسي المجروح


ما عم بفهم عالكلمات،
يللي صوبك عم بتروح،
مع إنّي الليلة بالذات، 
صوتي مش طالع مبحوح


 ما عم بفهم عالأفكار،
يللي حولك عم بتدور، 
تقرا بعيونك أسرار، 
وتكتب عا شفافك سطور


ما عم بفهم كيف النهار،
لماّ ينشّف منّو النور، 
ويصرخ ليلو "مشّي سهار"، 
بيسهر بعيونك مسرور


ما عم بفهم كلّ الناس،
ولا عم بفهم كلّ الفنون، 
شويّة بتطلّع بالكاس، 
وشويّة بخصرك مفتون


ما عم بفهم عالإحساس،
يللي بقلبي عم بيكون، 
إن سكرة أو برمة راس،
أو شعلة حبّك بجنون