تبّولة وخسّة ولحمة وكاس على تويتر

شيش اللحمة وتبّولة وخسّة من الجلّ
يا حلوة شو بتقولي حدّك رح ضلّ
تا إمّك هالمهبولة عنّك ما تحلّ
إلاّ و نفسا مشغولة براسا الوسواس


من بيروت (@BeirutBilArabeh):


يا قاعد حدّ الحلوة الأطرى من الخس
بين اللقمة واللقمة في شوية دسّ
تاري إمّا الملعونة فاتت عاللسّ
قلب الإم الحنونة بيقرا النسناس


أنا:


أوعى تقلي عم نسنس عا قلب الإمّ
إذا شويّة عم دسدس شو وين الهمّ
ما فيّي ضلني بصبص واللقمة سمّ
إن ما دقّينا كاسا وعبّينا الراس


قامت إمّا تتقلّي العريشة وين
وبرمة كاسا يا دلّي بتملّي العين
قلتلاّ دخلك ضلّي بغرق بالدين
وبتديّن منّك بوسة وبعلن إفلاس


والحلوة زعلت منّي إمّا حبيت
وإمّا عم تحلا كل ما كاسي عبّيت
جينا تنحبّ الحلوة حبّينا البيت
والبيت بيحلا بستّو وهيّي الأساس