...عا رواق... حلو الرواق

Wednesday, December 28, 2011

يا لحظة عم بتموت


يا لحظة العم بتموت
تِخنُق معها سنة
تمرُق عا كلّ البيوت
تتودّع هالدني،
وقّفيلي عندا شوَي،
ذكّريها بعينيّي
وعا خدودا رشّي مَيّ
وقولي عم تِبكي عليّي،
قولي عم تِبكي شَوق،
عم تبكي حنين،
تا لمّا تصيري فَوق
مع بقيّة السنين،
يبقى عندك تذكار
عأجمل عيون،
وعقلبي يللي صار،
عالبُعِد مجنون.

Friday, December 9, 2011

شو اتغيّر؟

لمّا كنّا ولاد صغار
عم نلعب تحت الزيتون
لا حكيوا علينا أخبار
ولا سألونا مين منكون

شو اللي اتغيّر، شو اللي صار
لمّا حبّينا بجنون
إن زرنا الجلّ بْشِي نهار
منصفّي حكاية العيون...

نحنا اللي سوا ربينا 
ولعبنا حدّ الدكّان
وكل الجيرة تنسينا
عم نلعب خلف الحيطان

شو يللي اتغيّر فينا
 كبرنا وصار الحبّ عنوان
وإن ورا حيط قفينا
شغلنا لسانات النسوان...