...عا رواق... حلو الرواق

Tuesday, November 27, 2012

صيبة عين... على تويتر


خبّي إبنِك الفركوش
وخلّيلي شعرِك منكوش
ولا تعبّي جاط الفتّوش
جايي فطّوم وعلّوش

وبركي صابونا بالعين

أوعا إبني تطلع هيك
يقولوا عنّك إبن البَيك
جويلي تيابك وجوي دَيك
لمّا توقع عين عليك

تا ما يصيبونا بالعين

أوعا تكبّري جزدانِك
وأوعا تفرجيني سنانِك
ولا تحكي ضبّي لسانِك
إن شافونا جيرانِك

بركي صابونا بالعين

للندب شكّل فرقة
وخلّي البصلة محترقة
ولبسلك خرزة زرقة
كلّ ما تمرقلك مرقة

بركي صابونا بالعين


رح إلبس خرزة زرقة
تتبعد عني العيون
أما للندب فرقة
إيه والله عمرا ما تكون

بركي صابونا بالعين

أنا: 

ضلّ معبّق متل شباط
وخلّي مسلّة تحت الباط
ولا تحكي، أحسن العياط
وعلّق من ورا صبّاط

بركي صابونا بالعين

إلبس عالقلبة تيابك
ولا تظهر كلّ حبابك
بركي بيبرم دولابك... 
يعني ** إخت الجابك

وإخت اللي صابك بالعين


عالقلبة لبسنا التياب
رقينا ورصاصة صبيت
ما رح يرتدوا الكلاب
حتى لو طيزي حكيت

بركي صابونا بالعين

أنا:

لا تبيّن إنّك مبسوط
ولا تنطنط متل الأبّوط
من حراجل لبيروت
في ألف وميّة عكروت

وبركي صابونا بالعين

خلّي القصّة معموعة
قولي غراضك منزوعة
وميّة بيتك مقطوعة
وجوزك غاشي ما بيوعى

بركي صابونا بالعين