...عا رواق... حلو الرواق

Tuesday, September 9, 2014

أوّل أيلول... على تويتر


طلّ بالشتي يبشّر شهر أيلول،
يسقي الأمل بشتولو العطشاني،
ينفخ حياة بيباس الحقول...
والصيف شمسو عالمفرق التاني.

طلّ حامل شتي ونتاتيف غيوم،
واستكبر بوجّ الصيف يصرخ "روح"،
وهوّي اللي بِحرّ الشمس مغروم،
تاري الشتي صرخة قلب مجروح

طلّ يعاتب الشمس عالجفا،
ولبّد السما بغيوم شتويّة، سما اتعوّدت بالصيف عالصفا، بكيت اليوم عاللبدة القويّة 

طلّ حامل خريف بِجعبتو،
شي متل لعبة الموت الأكيد،
يعزم الورقات تلعب لعبتو، 
وتترك الأغصان بهيجة العيد

طلّ وحامل بجعبتو شتي،
وحامل معو كمشة القوافي،
طلّ والصيف ختير وهوّي فتي، 
والجوّ معكّر والذهن صافي...

إجا أيلول ومدري شو جرى،
كرجوا القوافي وعجقت الردّات،
متل الوحي أو متل شي مرا، 
أو متل حبوب الندي عالوردات