...عا رواق... حلو الرواق

Thursday, June 28, 2012

رجلٌ وقضيّة...

أنا رجلٌ بلا قضيّة
بَطُلت عندي كلُّ القضايا
قتلتها من صغري أيادٍ خفيّة
وكم في بلادنا من خفايا
وكم فيها من قضايا همجيّة
ترضع حلمة قذيفةٍ أو شظيّة
أو رصاصةٍ طائشةٍ غبيّة...
وكم في بلادنا من غباءٍ
ورصاصٍ، وقذائف وشظايا

أنا قضيّةٌ... كنتُ قضيّة
إلى أن فُقِدتُ على حواجز بربريّة
قُتِلتُ... صُفِّيتُ "على الهويّة"
تعلّمتُ باكراً أنَّ الوطن أكبرُ الخطايا
أن لا مكان لهُ
في حروبنا المقدّسة الإلهيّة
وتعلّمتُ... أنَّ في رحم كلِّ عربيّة
مشروع وحشٍ من وحوش الرواية
روايةٌ أبطالها وهميّة
وحبكة عقدها أبديّة
ولا خلاصٌ ولا نهاية...

فاعذروني...
أنا رجلٌ بلا قضيّة
تقودني عيونٌ عسليّة
ولمساتٌ مخمليّة
وبعض فساتين الصبايا.

Friday, June 22, 2012

مشتاقٌ إلى بلدتي يا غُربة - شوق مغتربٍ على تويتر


سألت الدنية شو صاير
كيف الضيعة وأخبارا
كيف الطير اللي طاير
والخرّوبة والجارة؟

سألت الضيعة وقلتلاّ
مين اتجوّز ستّ الكلّ؟
تقبر قلبي اشتقتلاّ،
بعدا صوبِك عم بتطلّ؟ 

سألت الدرب اللي واصل
بيتي بمفرق بيتا
وينا ما عم بتراسل؟
نسيِت إنّي حبّيتا؟

سألت الشمس العم بتغيب
في كشك عا سطح البيت؟
في زعتر؟ سمّاق؟ زبيب؟
باعت إمّي تناك الزيت؟ ‎‫

‬‏سألت العربَيشة بالحيّ
بعدا بتسقيكي الجارة
وبتفضّي خزان الميّ
البيغذّي كلّ الحارة؟ 

سألت التينة البعد شويّ
بيغزوها كلّ الشباب:
بعدا عم تقعد بالفيّ
وتفلفش بإيدا كتاب؟ 

سألت الحجرة الخلف الباب
بتلعبي سبع حجارة؟
منقسم بالنصّ الشباب
وكم عصفورة طيّارة ‎

سألت العريشة عالسطح
لازم قعدة أركيلة
وكاس العرق يبطح بطح
وأحلى سكرة مقابيلي

سألت الورق بالسهرة
وينن شباب الطرنيب
وين صوات الـ"بو زهرة"
وصوت البومة وصوت الديب؟ ‎‫

سألت الأرزة الختيارة
قالولي صار عندا ولاد
وبتطلطل كم زيارة
قوليلي كيف صرنا بعاد؟ ‎

سألت القمر والنجمات
كيف الجيرة وأصحابي
مين الخلّف مين المات
ومين البعدن عزّابي؟ ‎

عم بسأل طرقات البيت
اللي بِريوا عليها نعالي
مهما بالدنية لفّيت
يردّوني عالكحّالة ‎.
‬‏ ‎