...عا رواق... حلو الرواق

Wednesday, July 13, 2011

صبحيّة جارتنا

وعيت جارتنا بكّير ولبستلن أحلا تيابا
وعملت قهوة مرّة كتير بتحلا عا شفاف صحابا
وصلو صحابا جمع كبير وصارو يدقّو عا بابا
وحدة لبستلن قصير ووحدة لبست قبقابا

هيّي دغري صرخت "مين؟" وركضت جابت مفتاحا
ودغري فَتْحت للحلوين و"أهلا نوّرتو الساحة!"
وبوسة شمال وبوسة يمين والبِقيِت عالمرتاحة
ودغري بلّش التدخين وجمّرت القداحة!

وركضت جارتنا من الدار ونقزو كلّن رفقاتا
نسيت الركوة عالنار وفارو كلّن قهواتا
وفنجان القهوة القهّار اللي اندلق من ديّاتا
بيوصل ومعو الخبار وخبارن هيّي ذاتا:

هيدي ما بتحكي فُلان وهيدي لازم نتصافى
وهيدي إبنا شو كسلان وهيدي مريضا تعافى
هيدي اتشردق الفنجان من حلاوة شفافا
وهيدي مشلحها نعسان نام وغفي عا كتافا

هيدي نسيت بالجرور قلام الحمرة اللماعة
وهيدي صارت قدّ بدور بطّل قميصا يساعا
وعا قميصا زهور زهور وصارت رمز البشاعة...
وأنا عم ببرم وبدور بالفرشة صرلي ساعة!

عالصبحيّة صرت زبون حافظلا كلّ خبارا
هيدي صاحبها مجنون وهيدي جَبلا إسوارة
هيدي جوزا ما بيخون وهيّي... هيّي دوّارة
شوفو النَومة كيف بتكون عا صبحيّة هالجارة!

No comments:

Post a Comment